Tarjei Bø og Emil Hegle Svendsen.
Etter nokre forferdeleg resultat på standplass og i sporet den siste tida, håpar skiskyttarkompisane Tarjei Bø og Emil Hegle Svendsen på suksess med sitt siste påfunn. No opnar dei eige treningssenter for «Ola Nordmann» på Lillehammer, der dei begge bur.
Investerer tre mill
- Vi gler oss til å trene saman med lillehamringane. Ønskjet er å skape eit godt treningsmiljø. Med topp utstyr, effektiv oppfølgjing og kompetente personlege trenarar vil senteret tilby noko ekstra for medlemmene sine. Dette skal vere eit senter for alle, med tilbod om kurs i trening og kosthald, seier skiskyttarstjernene til Dagens Næringsliv.
I alt er det investert dryge tre millionar kroner i senteret, som vert 600 kvadratmeter stort. Hovudaksjonærar er Bø, Hegle Svendsen og investoren Thomas Almskog.
Stryningen Bø og lagkameraten eig ifølgje DN 22 prosent kvar i senteret, og skal også fungere som personlege trenarar og halde føredrag for medlemmene.
Deira eigen baby
- Det blir spennande å jobbe med folk på det personlege planet, både dei som er godt trente og dei som akkurat har begynt. Vi har høyrt mykje om treningsiveren og gleda med det å trene i distriktet, så no får vi sjå om det stemmer, seier Bø og Svendsen.
- Vår innsats i senteret i tillegg til å vere to av hovudinvestorane, er å trene og vere tilstades i treningsstudioet utanom sesongen. Dette blir vår eigen lille baby, seier dei til DN.
