Sogndal ikkje interessert i bodet som kom inn på Even Hovland.
– Vi fekk eit bod frå Molde på Even, men har takka nei då det var for dårleg, seier sportsleg leiar i Sogndal Fotball, Trond Fylling til Sogn Avis.
Ifølgje Romsdals Budstikke vil forhandlingane gå utover kvelden, noko som kan føre til at Hovland blir Molde-spelar innan morgondagen. Då går nemleg overgangsfristen ut.
Ikkje hastverk med sal
Fylling seier dei ikkje har noko hastverk med å selje.
Sportsleiaren seier til Sogn Avis at han vart overraska då bodet frå Molde som kom måndag morgon.
– Marknaden er trongt for tida, der få klubbar har pengar å rutta med. Difor hadde vi ikkje rekna med at det skulle koma noko bod, seier den sportslege leiaren og legg til at alle spelarane til Sogndal i utgangspunktet er til sals- dersom prisen er rett.
Ukjent prislapp
– På den andre sida ønskjer me i utgangspunktet å behalda alle spelarane våre, men i fotballen er det av og til slik at ting endrar seg. Totalen er viktig i denne saka, og vi må og ta ein runde med Even og finna ut kva han ønskjer, seier Fylling som ikkje vil ut med kva som er prislappen på Hovland.
