Ny «miljøferje» skal ta ein tredel av trafikken på Lavik-Oppedal dei neste ti åra.
Statens vegvesen inviterer fire nasjonale ferjeselskap til å vere med i konkurransen om utvikling og drift av ei meir energi- og miljøeffektiv ferje på strekninga E39 Lavik - Oppedal. Dette skriv Samferdsledepartementet i ei pressemelding.
Den nye miljøferja medfører at det blir tre ferjer på sambandet Lavik - Oppedal, mot to ferjer i dag. Miljøferja skal ta om lag ein tredjedel av all trafikken på sambandet.
- Regjeringa har som mål å redusera klimautsleppa. Dette blir eit viktig tiltak for å nå målet, seier samferdsleminister Magnhild Meltveit Kleppa.
Fjord1 med i kampen
Det er selskapa Norled, Torghatten Trafikkselskap, Fjord 1 Fylkesbaatane og Boreal som skal konkurrere om å utvikle ein ferjetype som skal bidra til ei meir miljøvenleg ferjeflåte.
Dei fire selskapa har sidan i fjor vore i dialog med Vegdirektoratet om utvikling av energi- og miljøeffektive løysingar for ferjeflåten.
Dialogen kom i stand etter at Vegdirektoratet i juni i fjor utlyste ein utviklingskonkurranse for drift av ei ny ferje i sambandet E39 Lavik - Oppedal, over Sognefjorden.
I utlysinga vart verfts- og reiarlagsnæringa inviterte til å konkurrera om levering av den mest miljø- og energieffektive ferja.
- Interessante løysingar
- Dei fire tilbydarane har - i utviklingsfasen - lagt fram interessante løysingar, som opnar for store framsteg i arbeidet med ei meir miljøvenleg ferjedrift. For verftsnæringa og verksemder som leverer varer og tenester til verftsnæringa, opnar konkurransen for interessante oppgåver og utfordringar på eit felt og i en internasjonal marknad der det dreier seg om smarte og miljøvenlege løysingar, seier samferdselsministeren.
Ved utlysinga i fjor har staten ikke bunde seg til ein spesiell teknologi. Det gjer at tilbydarane står fritt når det gjeld å utvikla eigne løysingar.
Inngåing av kontrakt for drift av ny ferje i sambandet vil skje i juni i år. Kontrakten skal gjelde for ein periode på ti år.
