- Vi får det ikkje til å gå rundt.
- Etter at vi hadde lagt pengar til side til faste utgifter, hadde vi att 12.000 kroner til vedlikehald av to kyrkjer og tre gravplassar.
Dette hjartesukket kom frå tidlegare kyrkjeverje i Jølster, Jon Ivar Friborg, under formannskapsmøtet tysdag, skriv Firda Tidend.
Friborg orienterte formannskapet om store utfordringar med to gamle kyrkjer og eit krevjande publikum i høve til stell av gravplassane.
- Vi får fort kritikk om ikkje alt er på stell der. Folk ventar at vi skal slå kantane rundt kvar gravstein utan at vi sprutar gras innpå steinane. Slikt tek tid, sa Friborg.
Han meiner ingen i kommunen ville ha arbeidd under slike vilkår som dei som arbeider i kyrkja gjer.
- Vi må seie opp kyrkjeverje eller kyrkjegardsarbeidar for å få midlane til å strekkje til, og det kan vi ikkje, sa Friborg.
