Enova har tildelt 28 millionar kroner til Fjord Miljøenergi AS for bygging av Ulvesund Kraftvarmeverk på Trollebø i Måløy.
Reduserer CO2- utslepp
Anlegget skal vinne att energi frå avfall og vil ha ein kapasitet på levering av inntil 64GWh fornybar energi.
Kraftvarmeverket skal i første byggjetrinn forsyne industrien på Trollebø med damp, medan framtidige byggjetrinn vil tilby fjernvarme i sentrale deler av kommunen. Fullt utbygd vil fjernvarmeanlegget i Måløy erstatte forbrenninga av 6,4 millionar liter olje årleg i industri og lokale varmesentralar, og bidra til å redusere utsleppa av CO2 med 18000 tonn årleg. Desse kutta svarar til dei årlege utsleppa frå om lag 9000 personbilar.
– Potensialet for konvertering til fornybar energi i industrien er monaleg, og dette er eit område som vil bli satsa på i tida framover, seier rådgjevar Andreas Stokke i Enova SF.
God miljøgevinst
– EU-direktivet som forbyr deponering av gjenvinnbart avfall vart gjort gjeldande i Norge i fjor, og frå vårt omland vert dette transportert ut av regionen og i stor grad ut av landet for å nyttast i energiproduksjon. Måløy-anlegget vil gjere det mogeleg å hente ut desse verdiane i vår region, og samstundes gje miljøgevinst for lokalsamfunnet og næringsmiddelindustrien gjennom redusert bruk av fyringsolje, seier Trond-Inge Kvernevik, dagleg leiar i Fjord Miljøenergi.
Glad for millionløyvinga er også konsernsjefen i Sogn og Fjordane Energiverk:
– SFE er ein av eigarane i Fjord Miljøenergi. Gjennom støtta frå Enova er Ulvesund Kraftvarmeverk eitt steg nærare realisering – noko som vil bety auka produksjonen av fornybar energi, samt auka verdiskaping for SFE, seier Ole Schanke Eikum.
Fjord Miljøenergi har tidlegare motteke kr 500.000 i støtte frå Innovasjon Norge i Sogn og Fjordane til utvikling av fjernvarme i Sogn og Fjordane. Selskapet har og fjernvarmekonsesjon i Førde.
- Kva retning bør kunstlivet ta?
Prikken som fekk lappen til å fly
- Kva retning bør kunstlivet ta?
Prikken som fekk lappen til å fly
